នៅថ្ងៃទី៣១ខែសីហា លោក Phumtham Wetchayachai នាយករដ្ឋមន្ត្រីស្តីទី និងជាតំណាងសម្ព័ន្ធរដ្ឋាភិបាលចាំផ្ទះ បានបញ្ជាក់ក្រោយកិច្ចប្រជុំជាមួយមេដឹកនាំគណបក្សប្រជាជន (PP)ថា គណបក្សចម្រុះទាំងអស់ក្នុងសម្ព័ន្ធរដ្ឋាភិបាល បានឯកភាពទទួលយកលក្ខខណ្ឌដែលគណបក្សប្រជាជនបានដាក់ឡើង ហើយកំពុងរង់ចាំការសម្រេចចិត្តចុងក្រោយពីគណបក្សនោះ។
ប្រភពពីសារព័ត៌មានKhaosod។
លោក Phumtham បាននិយាយថា គាត់រំពឹងថានឹងមានដំណោះស្រាយក្នុងពេលឆាប់ៗនេះ ដើម្បីបង្កើតរដ្ឋាភិបាលថ្មី និងរំពឹងថា សភាបច្ចុប្បន្ននឹងត្រូវបានរំលាយក្នុងរយៈពេលប្រហែល ៤ ខែខាងមុខ។
ក្នុងពេលតែមួយហ្នឹង អ្នកគាំទ្រគណបក្សភឿថៃបានប្រមូលផ្តុំគ្នា ហើយស្រែកថាភឿថៃ តស៊ូ!ដើម្បីបង្ហាញពីកម្លាំងគាំទ្ររបស់ពួកគេ។
កិច្ចប្រជុំរវាងសម្ព័ន្ធដឹកនាំដោយគណបក្សភឿថៃ និងគណបក្សប្រជាជនបានប្រព្រឹត្តឡើងប្រហែលមួយម៉ោង។ លោក Phumtham បានប្រាប់ថា សម្ព័ន្ធរដ្ឋាភិបាលបានប្រគល់ឱ្យគណបក្សភឿថៃដឹកនាំការសម្របសម្រួលក្នុងការបង្កើតរដ្ឋាភិបាលថ្មី។
ទាក់ទងនឹងអវត្តមានតំណាងគណបក្ស United Thai Nation ដោយសារតែជំងឺ លោក Phumtham បានអះអាងថា គាត់ត្រៀមខ្លួនសម្រាប់ចូលរួមតាមប្រព័ន្ធអនឡាញ ប្រសិនបើមានចម្ងល់ឬក្តីព្រួយបារម្ភ។
លោកបានបន្ថែមថា សម្ព័ន្ធចម្រុះបានឯកភាពលើសំណើដូចគ្នា ព្រោះបានចាត់ទុកស្ថានការណ៍នយោបាយបច្ចុប្បន្នជាវិបត្តិ ដែលត្រូវការដំណោះស្រាយរួម៕