KATHMANDU (Reuters)៖ កងទ័ពនេប៉ាល់បានដាក់ “បញ្ជាហាមប្រាម” ខណៈដែលភាពស្ងប់ស្ងាត់បានកើតមាន នៅក្នុងប្រទេសកាលពីថ្ងៃពុធមួយថ្ងៃបន្ទាប់ពីការតវ៉ារីករាលដាលដកក្តៅគគុក ដែលបានបណ្តេញរដ្ឋាភិបាលរបស់នាយករដ្ឋមន្ត្រី KP Sharma Oli។ នេះបើយោងតាមការចេញផ្សាយដោយភ្នាក់ងារ Reuters។
កងទ័ពនេប៉ាល់ បាននិយាយនៅក្នុងសេចក្តីថ្លែងការណ៍មួយថា “បទបញ្ជាហាមប្រាមនឹងនៅតែជាធរមានរហូតដល់ម៉ោង 5:00 ល្ងាចថ្ងៃនេះ (1115GMT) បន្ទាប់មកបម្រាមគោចរនឹងត្រូវដាក់នៅទូទាំងប្រទេសចាប់ពីម៉ោង 6:00 ព្រឹកថ្ងៃព្រហស្បតិ៍ (0015 GMT, ថ្ងៃពុធ)” នេះបើយោងតាមសារព័ត៌មាន Himalayan Times ។
សេចក្តីថ្លែងការណ៍បានបន្ថែមថា “ការសម្រេចចិត្តបន្ថែមទៀតនឹងត្រូវធ្វើឡើងអាស្រ័យលើស្ថានភាពសន្តិសុខដែលកំពុងវិវត្ត”។
ទាហានត្រូវបានដាក់ពង្រាយនៅទូទាំងប្រទេស កាលពីយប់ថ្ងៃអង្គារ ដើម្បីរក្សាច្បាប់ និងសណ្តាប់ធ្នាប់ ប៉ុន្មានម៉ោងបន្ទាប់ពីលោក Oli បានចុះចេញពីតំណែងក្រោមសម្ពាធពីក្រុមបាតុករដែលបានដុតបំផ្លាញអគាររដ្ឋាភិបាលសំខាន់ៗ រួមទាំងសភា លំនៅដ្ឋានឯកជន និងការិយាល័យប្រធានាធិបតីរបស់លោក។
នៅតំបន់ Singha Durbar ដែលជាផ្ទះរបស់ក្រសួងសំខាន់ៗ ក៏ត្រូវបានខូចខាតយ៉ាងធ្ងន់ធ្ងរផងដែរ។ ក្រសួងសុខាភិបាល និងប្រជាជន រួមជាមួយនឹងការិយាល័យរដ្ឋាភិបាលផ្សេងទៀត រួមទាំងតុលាការកំពូល ត្រូវបានបំផ្លាញទាំងស្រុង។
«យ៉ាងហោចណាស់បាតុករ 20 នាក់ ដែលភាគច្រើនជាយុវជនត្រូវបានសម្លាប់ និងជិត 350 នាក់ផ្សេងទៀតបានរងរបួសចាប់តាំងពីថ្ងៃចន្ទ នៅពេលដែលការតវ៉ាបានផ្ទុះឡើងបន្ទាប់ពីការហាមឃាត់លើប្រព័ន្ធផ្សព្វផ្សាយសង្គមដោយរដ្ឋាភិបាល»។
ទាហានត្រូវបានគេដាក់ពង្រាយដើម្បីរក្សាច្បាប់ និងសណ្តាប់ធ្នាប់ ខណៈក្រុមបាតុករបានបំផ្លិចបំផ្លាញទ្រព្យសម្បត្តិសាធារណៈ ព្រមទាំងដោះលែងអ្នកទោស។
ថ្លែងទៅកាន់ប្រជាជាតិកាលពីយប់ថ្ងៃអង្គារ អគ្គមេបញ្ជាការកងទ័ពលោក Ashok Raj Sigdel បានអំពាវនាវឱ្យប្រជាជនរក្សាភាពស្ងប់ស្ងាត់ និងធ្វើការសន្ទនាដើម្បីដោះស្រាយវិបត្តិនៅក្នុងប្រទេសហិមាល័យមួយនេះ។
ទោះបីជាមិនមានមេដឹកនាំជាក់លាក់ណាមួយនៃចលនាតវ៉ានេះក៏ដោយ កងកម្លាំងសន្តិសុខត្រូវបានគេរំពឹងថានឹងរៀបចំកិច្ចប្រជុំជាមួយនឹងអ្នកដែលដឹកនាំបាតុកម្មមួយចំនួន។
ដោយឡែកពីគ្នា ប្រទេសចិនកាលពីថ្ងៃពុធបានសម្តែងក្តីសង្ឃឹមថាគ្រប់ភាគីនៅក្នុងប្រទេសនេប៉ាល់ “អាចដោះស្រាយបញ្ហាក្នុងស្រុកបានត្រឹមត្រូវ និងស្តារសណ្តាប់ធ្នាប់សង្គម និងស្ថិរភាពជាតិឱ្យបានឆាប់តាមដែលអាចធ្វើទៅបាន”។
អ្នកនាំពាក្យក្រសួងការបរទេសលោក Lin Jian បាននិយាយថាប្រជាជាតិទាំងពីរជាប្រទេសជិតខាងជាប្រពៃណី៕