លោក Kash Patel នាយកការិយាល័យស៊ើបអង្កេតសហព័ន្ធអាមេរិក(FBI)និយាយថា ជនដៃដល់ដែលបាញ់សម្លាប់លោក ឆាលី ឃើក អាយុ៣១ឆ្នាំ ជាមនុស្សជំនិតរបស់លោកប្រធានាធិបតី ដូណាល់ ត្រាំ ត្រូវចាប់ខ្លួនបានហើយ បច្ចុប្បន្នជននេះស្ថិតក្រោមការឃុំខ្លួនបណ្ដោះអាសន្ន។
ប្រភពពីReuters។
សកម្មជនស្ដាំនិយមអាមេរិក និងជាអ្នកអត្ថាធិប្បាយដ៏មានប្រជាប្រិយភាពម្នាក់ លោក ឆាលី ឃើក ដែលជាមនុស្សជំនិត របស់ប្រធានាធិបតីអាមេរិក លោក ដូណាល់ ត្រាំ ត្រូវបានខ្មាន់កាំភ្លើងបាញ់សម្លាប់ ក្នុងពិធីសំណេះសំណាលនៅឯសាកលវិទ្យាល័យមួយក្នុងរដ្ឋ Utah កាលពីថ្ងៃពុធ ទី១០ ខែកញ្ញា ។
ខណៈអភិបាលរដ្ឋ Utah បានចាត់ទុកថា នេះជាការធ្វើឃាត មានបង្កប់ចេតនានយោបាយ។
ក្នុងវីដេអូបង្ហោះលើបណ្ដាញទំនាក់ទំនងសង្គម គេឃើញលោក Charlie Kirk មានអាយុ៣១ឆ្នាំ កំពុងអង្គុយសំណេះសំណាលជាមួយក្រុមនិស្សិតនៅខាងក្រៅសាកលវិទ្យាល័យ Utah Valley University ក្នុងទីក្រុង Orem រដ្ឋ Utah នៅម៉ោងប្រហែល ១២៖២០នាទីថ្ងៃត្រង់ កាលពីថ្ងៃពុធ។
អង្គុយបានមួយសន្ទុះស្រាប់តែឮស្នួរគ្រាប់កាំភ្លើង ហើយលោក Kirk បានយកដៃស្ទាបក ហើយក៏ដួលពីលើកៅអីអង្គុយ ធ្វើឱ្យភាពចលាចលកើតឡើង។
វីដេអូមួយផ្សេងទៀត បានបង្ហាញពីឈាមហូរចេញពីករបស់លោក Kirk ភ្លាមៗក្រោយលោកត្រូវបានគេបាញ់ប្រហារ៕