ទីភ្នាក់ងារសារព័ត៌មានហ្វីលីពីន បានរាយការណ៍កាលពីថ្ងៃអាទិត្យទី២៨ខែកញ្ញា ថាមនុស្សយ៉ាងហោចណាស់ 26 នាក់បានស្លាប់ និង 14 នាក់ទៀតកំពុងបាត់ខ្លួន និង 33 នាក់ផ្សេងទៀតបានរងរបួសនៅក្នុងប្រទេសហ្វីលីពីន ដោយសាររងឥទ្ធិពលព្យុះត្រូពិច Bualoi ។
ប្រភពពីសារព័ត៌មានReuters។
ក្រុមប្រឹក្សាកាត់បន្ថយ និងគ្រប់គ្រងហានិភ័យគ្រោះមហន្តរាយជាតិបាននិយាយថា ប្រជាពលរដ្ឋសរុបចំនួន 738,714 គ្រួសារ ឬ 2,797,706 នាក់បានរងផលប៉ះពាល់ដោយភ្លៀងធ្លាក់ខ្លាំង ទឹកជំនន់ និងការបាក់ដីជាច្រើនថ្ងៃដោយសារព្យុះស៊ីក្លូនត្រូពិច ដែលក្នុងស្រុកហៅថា Opong, Nando និង Mirasol ។
យោងតាមក្រុមប្រឹក្សានេះ គ្រួសារចំនួន 46,611 ឬ 163,317 នាក់កំពុងស្នាក់នៅក្នុងមជ្ឈមណ្ឌលជម្លៀសចំនួន 2,680 ខណៈដែល 31,448 គ្រួសារផ្សេងទៀត ឬ 118,957 នាក់កំពុងទទួលបានជំនួយនៅខាងក្រៅមជ្ឈមណ្ឌលទាំងនេះ។
ព្យុះ Bualoi កំពុងរំកិលទៅភាគពាយ័ព្យក្នុងល្បឿន 25-30 គីឡូម៉ែត្រក្នុងមួយម៉ោង (15-18 ម៉ាយក្នុងមួយម៉ោង) ហើយត្រូវបានគេរំពឹងថានឹងឆ្លងកាត់ក្បែរឆ្នេរសមុទ្រភាគខាងត្បូងរបស់ Hainan មុនពេលវាយលុកភាគខាងជើងភាគកណ្តាលប្រទេសវៀតណាមនៅយប់ថ្ងៃអាទិត្យ៕