សហរដ្ឋអាមេរិកបានបញ្ជាក់ថា ខ្លួនឈរជាមួយសម្ព័ន្ធមិត្តហ្វីលីពីន និងព្រមានចិនបន្ទាប់ពីកើតការប៉ះទង្គិចគ្នារវាងនាវាឆ្នេរសមុទ្រចិន និងនាវាហ្វីលីពីននៅសមុទ្រចិនខាងត្បូង។
ប្រភពពីសារព័ត៌មានCNA នៅថ្ងៃទី14 ខែតុលា។
កាលពីថ្ងៃអាទិត្យ នៅជុំកោះស្ព្រាតលី នាវាឆ្នេរសមុទ្រចិនលេខ 21559 បានប្រើកាណុងបាញ់ទឹកប្រឆាំងនាវា BRP Datu Pagbuaya នៃហ្វីលីពីន បង្កភាពតានតឹងកើនឡើងនៅក្នុងតំបន់ដែលមានជម្លោះ។
អ្នកនាំពាក្យក្រសួងការបរទេសសហរដ្ឋអាមេរិក លោក Tommy Pigott បានថ្កោលទោសសកម្មភាពនេះ និងសង្កត់ថា ទីក្រុងវ៉ាស៊ីនតោន ស្ថិតនៅខាងសម្ព័ន្ធមិត្ត ហ្វីលីពីន នៅពេលពួកគេប្រឈមមុខនឹងសកម្មភាពដ៏គ្រោះថ្នាក់ដែលបំផ្លាញស្ថិរភាពក្នុងតំបន់។
លោក Pigott បានរំលឹកថា មាត្រាទី 4 នៃសន្ធិសញ្ញាការពារទៅវិញទៅមកអាមេរិក-ហ្វីលីពីន ឆ្នាំ 1951 ពង្រីកដល់ការវាយប្រហារដោយប្រដាប់អាវុធលើកងកម្លាំង ប្រដាប់អាវុធហ្វីលីពីន នាវាសាធារណៈ ឬយន្តហោះ រួមទាំងឆ្មាំឆ្នេរសមុទ្រ គ្រប់ទីកន្លែងនៅក្នុងសមុទ្រចិនខាងត្បូង។
ករណីនេះបង្ហាញពីភាពតានតឹងបន្តរវាងចិន និងហ្វីលីពីន នៅតំបន់ដែលសំខាន់សម្រាប់សន្តិសុខ និងសេដ្ឋកិច្ចអន្តរជាតិ៕