មន្ត្រីនិងអ្នកពន្លត់អគ្គីភ័យ បាននិយាយថា យ៉ាងហោចណាស់មនុស្ស 22 នាក់ ក្នុងនោះរួមមានជនជាតិចិន19នាក់បានស្លាប់។
ក្នុងហេតុការណ៍ភ្លើងឆេះរោងចក្រអាគុយលីចូម នៅក្នុងប្រទេសកូរ៉េខាងត្បូង កាលពីថ្ងៃចន្ទ។
ការឆាបឆេះបានចាប់ផ្តើមនៅរោងចក្រផលិតអាគុយលីចូម Aricell ក្នុងទីក្រុង Hwaseong ជិតរដ្ឋធានីសេអ៊ូល នៅម៉ោងប្រហែល 10:30 ព្រឹក ម៉ោងក្នុងស្រុក (0130 GMT) ។
ក្រុមអ្នកពន្លត់អគ្គីភ័យ បានចូលទៅខាងក្នុងអគារ បន្ទាប់ពីអគ្គីភ័យត្រូវបានគ្រប់គ្រងនៅម៉ោងប្រហែល 3 និង10 នាទីរសៀល។
ក្រៅពីជនជាតិចិន ជនរងគ្រោះម្នាក់ជាជនជាតិឡាវ និងម្នាក់ទៀតមិនស្គាល់សញ្ជាតិ។
ប្រធានាធិបតី Yoon Suk Yeol ក៏បានទៅទស្សនាកន្លែង ដែលគាត់ត្រូវបានប្រាប់ដោយមន្ត្រីអំពីប្រតិបត្តិការជួយសង្គ្រោះ និងស្ថានភាពចុងក្រោយបង្អស់។
មុននេះ លោកបានចេញសេចក្តីណែនាំបន្ទាន់ ដើម្បីចល័តបុគ្គលិក និងឧបករណ៍ដែលមានទាំងអស់ ដើម្បីផ្តោតលើការស្វែងរក និងជួយសង្គ្រោះមនុស្ស។
រដ្ឋមន្ត្រីក្រសួងមហាផ្ទៃ និងសុវត្ថិភាពលោក Lee Sang-min ក៏បានស្នើឱ្យភ្នាក់ងាររដ្ឋាភិបាលពាក់ព័ន្ធ និងរដ្ឋាភិបាលក្នុងតំបន់ កៀរគរធនធាន និងបុគ្គលិកដែលមានទាំងអស់ ដើម្បីពន្លត់ភ្លើង និងជួយសង្គ្រោះអ្នកនៅរស់រានមានជីវិត។
ភ្លើងបានរីករាលដាលយ៉ាងឆាប់រហ័ស ខណៈដែលកោសិកាថ្មនៅខាងក្នុងផ្ទុះជាបន្តបន្ទាប់ ដែលបង្កការលំបាកដល់អ្នកជួយសង្គ្រោះក្នុងការចូលទៅខាងក្នុង និងស្វែងរក។
សារព័ត៌មាន Yonhap News បាននិយាយថា អ្នកស្លាប់ទាំងអស់ត្រូវបានរកឃើញនៅជាន់ទី២ នៃអគារលេខ៣ របស់រោងចក្រ។
យ៉ាងណាមិញ ព័ត៌មានលម្អិតផ្សេងទៀតនៃអ្នកស្លាប់មិនទាន់ត្រូវបានផ្ទៀងផ្ទាត់ទេ ហើយការធ្វើតេស្ត DNA នឹងត្រូវបានអនុវត្ត ដោយសារភ្លើងបានបំផ្លាញសាកសពយ៉ាងធ្ងន់ធ្ងរ៕