(ចិន)៖ ជាអ្នកបើករថយន្ត ទោះបីជារកបានប្រាក់ច្រើនក៏ដោយ ក៏អ្នកត្រូវធ្វើដំណើរ ទៅគ្រប់ទិសទី ហើយត្រូវនៅឆ្ងាយពីគ្រួសារ និងកូនៗ.!។
ថ្មីៗនេះ អ្នកបើកបរឡានដឹកទំនិញនៅក្នុងប្រទេសចិន មិនអាចទប់អារម្មណ៍របស់គាត់បានទេ ។
ពេលជួបការលំបាក បើកបរឡានធំហើយមានឧបសគ្គ ព្រិលធ្លាក់ខ្លាំង បុរសរូបនេះមិនហ៊ានបើកបរបន្តទៀត បើមានគ្រោះថ្នាក់អាចប៉ះពាល់ដល់ជីវិត។
អ្នកបើកបរ បានជាប់គាំងនៅក្នុងកន្លែងស្ងាត់មួយ ដោយសម្លឹងមើលព្រិលដ៏ត្រជាក់ដែលបក់មកលើមុខរបស់គាត់ ទឹកភ្នែករបស់គាត់លាយជាមួយនឹងព្រិល គាត់ក៏ស្រក់ទឹកភ្នែក។
វីដេអូរបស់គាត់ធ្វើឲ្យអ្នកនិយមលេងអ៊ីនធឺណេត អាណិតអាសូរជាខ្លាំង គាត់យំហើយនិយាយថា៖ ខ្ញុំមិននឹកស្មានថាវាពិបាក និងនឿយហត់ខ្លាំងពេកទេ។ បើខ្ញុំដឹង ខ្ញុំនឹងខំរៀននៅពេលខ្ញុំនៅក្មេង។ នៅពេលនោះនៅក្មេងខ្ញុំពិតជាមិនយល់ទេ។
គាត់ក៏បាននិយាយទៀតថា បើនៅក្មេងហើយមិនខំធ្វើការទេនោះអ្នកនឹងវេទនា។ តែបើនៅក្មេង ហើយខំប្រឹងរៀន យ៉ាងហោចណាស់ក៏អាចរកការងារសមរម្យបានដែរ ដោយមិនចាំបាច់ទៅធ្វើការនៅកន្លែងស្ងាត់ៗហើយឆ្ងាយបែបនេះ ញ៉ាំតាមខ្យល់ និងដេកក្រៅផ្ទះ ពិបាកណាស់។
បន្ទាប់ពីឃើញអ្នកបើកបរឡានយំនៅក្នុងវីដេអូ អ្នកនិយមលេងអ៊ីនធឺណិតជាច្រើនស្រក់ទឹកភ្នែក និងអាណិតអាសូរជាពន់ពេក និងមានអ្នកសម្តែងការលួងលោមថា មិនបាច់ស្តាយទេ ប្រហែលជាមានមនុស្សជាច្រើនដែលទៅរៀន ហើយទទួលបានជោគជ័យ ឥឡូវអង្គុយក្នុងបន្ទប់ដ៏កក់ក្តៅ ប៉ុន្តែប្រហែលជាមិនរកលុយបានច្រើនដូចអ្នកទេ។
ក៏មានអ្នកបញ្ចេញមតិថា វាមិនចាំបាច់មានការអប់រំល្អ និងការយល់ដឹងទូលំទូលាយដើម្បីមានជីវិតសប្បាយរីករាយនោះទេ។
មនុស្សគ្រប់រូបមានទុក្ខរៀងៗខ្លួន។ ខ្ញុំសង្ឃឹមថាអ្នកនឹងមានភាពរីករាយក្នុងអាជីពដែលអ្នកបានជ្រើសរើស និងជឿជាក់៕