ក្រោយបទឈប់បាញ់ ដែលទើបតែចូលជាធរមាន ការវាយប្រហារដោយដ្រូនរបស់អ៊ីស្រាអែលបានបណ្តាលឱ្យបុរសជនជាតិប៉ាឡេស្ទីនម្នាក់ស្លាប់នៅទីក្រុង Khan Younis តំបន់ខាងត្បូងនៃហ្គាហ្សា។ មន្ទីរពេទ្យ Nasser បានបញ្ជាក់ថា ការវាយប្រហារនេះកើតឡើងនៅពេលដែលប្រជាពលរដ្ឋកំពុងព្យាយាមស្ដារជីវិតត្រឡប់មកវិញក្រោយការប្រយុទ្ធយ៉ាងធ្ងន់ធ្ងរ។
ប្រភពពីសារព័ត៌មានAl Jazeera នៅថ្ងៃទី16 តុលា។
អ្នកសង្គ្រោះនៅកន្លែងកើតហេតុបាននិយាយថា ការវាយប្រហារនេះកើតឡើងនៅពេលពួកគេជឿថាស្ថានការណ៍សុវត្ថិភាពបានប្រសើរឡើងក្រោមបទឈប់បាញ់។ ទោះជាយ៉ាងណា មន្ទីរពេទ្យ Nasser បានអះអាងថា ការវាយប្រហាររបស់អ៊ីស្រាអែលនៅតែបន្តជាបន្តបន្ទាប់ ទោះមានការព្រមព្រៀងឈប់បាញ់ផ្លូវការជាមួយក្រុមហាម៉ាស់ក៏ដោយ។
ក្នុងពេលតែមួយ ក្រសួងការបរទេសអ៊ីស្រាអែលបានប្រកាសថា ការបើកច្រកព្រំដែន Rafah រវាងហ្គាហ្សា និងអេហ្ស៊ីបនឹងបន្តពន្យារពេល ដោយពួកគេអះអាងថាតម្រូវឱ្យមានការត្រួតពិនិត្យសន្តិសុខបន្ថែម។ ការពន្យារពេលនេះបានបង្កឱ្យមានការព្រួយបារម្ភពីស្ថាប័នសង្គមស៊ីវិល និងអង្គការសហប្រជាជាតិ ដែលបានព្រមានថា ការកក់ស្ទះជំនួយអាចបង្កឱ្យមានវិបត្តិមនុស្សធម៌ធ្ងន់ធ្ងរ៕