នៅថ្ងៃអាទិត្យ(ទី២៩ខែធ្នូ)អាជ្ញាធរនៅប្រទេសកូរ៉េខាងត្បូង បានឱ្យដឹងថា យន្តហោះមួយគ្រឿង ផ្ទុកមនុស្សសរុប១៨១នាក់ បានធ្លាក់នៅអាកាសយានដ្ឋានអន្តរជាតិ Muanបណ្តាលឱ្យមនុស្ស២៩នាក់ បាត់បង់ជីវិត។
ប្រភពពីសារព័ត៌មាន AFP នាថ្ងៃអាទិត្យ ទី២៩ ខែធ្នូ ឆ្នាំ២០២៤។
មន្រ្តីនៃទីភ្នាក់ងារពន្លត់អគ្គីសនីប្រចាំតំបន់ បានប្រាប់ថា មកទល់ឥឡូវ មនុស្ស២៩នាក់បានស្លាប់ ក្នុងគ្រោះថ្នាក់ខាងលើ ប៉ុន្តែតួលេខអាចបន្តកើនឡើងថែមទៀត ដោយសារតែមានអ្នករងរបួសធ្ងន់ជាច្រើន។ នាពេលនេះ ក្រុមសង្រ្គោះ កំពុងព្យាយាមជួយអ្នកដំណើរ ដែលនៅផ្នែកខាងក្រោយនៃយន្តហោះ។
គួររំលឹកថា បើតាមសារព័ត៌មានកូរ៉េខាងត្បូង Yonhap គ្រោះថ្នាក់នោះ ទំនងជាបានកើតឡើង ដោយសារការប៉ះទង្គិចជាមួយ ហ្វូងសត្វបក្សី ជាហេតុបង្កឱ្យកង់យន្តហោះមានបញ្ហា អំឡុងពេលវាព្យាយាមចុះចត នៅព្រលានយន្តហោះខាងលើ ដែលស្ថិតនៅ ភាគនិរតីនៃប្រទេស។ យន្តហោះខាងលើ ធ្វើប្រតិបត្តិការដោយក្រុមហ៊ុនអាកាសចរណ៍ Jeju Air ផ្ទុកអ្នកដំណើរសរុប១៧៥នាក់ និងក្រុមការងារយន្តហោះចំនួន៦នាក់ផងដែរ៕