ចំនួនអ្នកស្លាប់បានបន្តកើនឡើងដល់៦២នាក់ ក្នុងគ្រោះថ្នាក់យន្តហោះ១គ្រឿង ដែលផ្ទុកមនុស្ស១៨១នាក់ នៅភាគនិរតីប្រទេសកូរ៉េខាងត្បូង។
ប្រភពពីសារព័ត៌មាន AFP នាថ្ងៃអាទិត្យ ទី២៩ ខែធ្នូ ឆ្នាំ២០២៤។
អាជ្ញាធរបានឱ្យដឹងថា មកទល់ពេលនេះ មនុស្ស៦២នាក់បានបាត់បង់ជីវិត ខណៈ៣នាក់ត្រូវបានជួយសង្រ្គោះ ហើយ ទោះជាបែបនេះក្តី តួលេខអ្នកស្លាប់ អាចនឹងបន្តកើនថែមទៀត។ គ្រោះថ្នាក់ខាងលើ បានកើតឡើង ពេលយន្តហោះមួយគ្រឿងរបស់ ក្រុមហ៊ុនអាកាសចរណ៍ Jeju Air ព្យាយាមចុះចត នៅអាកាសយានដ្ឋានអន្តរជាតិ Muan។
បើតាមឃ្លីបវីដេអូចែកចាយលើបណ្តាញសង្គម គេមើលឃើញ អំឡុងពេលចុះចត តួខ្លួនរបស់យន្តហោះដែលជួបគ្រោះថ្នាក់ នៅអូសជាប់នឹង ផ្លូវចុះចតផ្ទាល់តែម្តង ហើយយន្តហោះនោះ បានបោះពួយយ៉ាងលឿនហួសផុតចេញពីផ្លូវ រហូតទីបំផុតទៅបុកជាមួយជញ្ជាំងការពារ ជាហេតុបណ្តាលឱ្យផ្ទុះឆេះឡើងយ៉ាងសន្ធោសន្ធៅ។
គួររំលឹកថា យោងតាមសារព័ត៌មានកូរ៉េខាងត្បូង Yonhap គ្រោះថ្នាក់នោះ ទំនងជាបានកើតឡើង ក្រោយការប៉ះទង្គិចជាមួយ ហ្វូងសត្វបក្សី ជាហេតុបង្កឱ្យម៉ាស៉ីន និងកង់យន្តហោះមានបញ្ហា អំឡុងពេលវាព្យាយាមចុះចត នៅព្រលានយន្តហោះខាងលើ។ យន្តហោះនោះ ជាប្រភេទ Boeing 737-800 មានគោលដៅហោះហើរ ចេញពីទីក្រុងបាងកកនៃប្រទេសថៃ ឆ្ពោះមកកាន់កូរ៉េខាងត្បូង ជាមួយ អ្នកដំណើរសរុប១៧៥នាក់ និងក្រុមការងារយន្តហោះចំនួន៦នាក់ផងដែរ៕