ប្រទេសកូរ៉េខាងត្បូងកាលពីថ្ងៃសុក្រ(ទី៧ខែមីនា)បានឲ្យដឹងថាចំនួនអ្នករបួសដោយសារយន្តហោះចម្បាំងទម្លាក់គ្រាប់បែកខុសគោលដៅបានកើនដល់២៩នាក់ហើយ។
ប្រភពពីសារព័ត៌មានAnadolu។
យោងតាមសារព័ត៌មាន Yonhap News ដែលមានមូលដ្ឋាននៅទីក្រុងសេអ៊ូល បានឱ្យដឹងថាយន្តហោះចម្បាំង KF-16 ចំនួនពីរគ្រឿងបានទម្លាក់គ្រាប់បែក MK-82 ចំនួនប្រាំបីគ្រាប់កាលពីថ្ងៃព្រហស្បតិ៍ នៅខាងក្រៅកន្លែងហ្វឹកហ្វឺនដែលបានកំណត់នៅទីក្រុង Pocheon ចម្ងាយប្រហែល 40 គីឡូម៉ែត្រ (25 ម៉ាយ)ភាគខាងជើងនៃរដ្ឋធានីសេអ៊ូល។
ការបំផ្ទុះគ្រាប់បែកនេះបានធ្វើឱ្យជនស៊ីវិល១៥នាក់ និងសមាជិកសេវា១៤នាក់រងរបួសខណៈជនស៊ីវិល២នាក់រងរបួសធ្ងន់នៅភូមិNogok-ri ភាគខាងជើង។
កាសែតបាងកកប៉ុស្តិ៍បានរាយការណ៍ថា
ជនស៊ីវិលបួននាក់ដែលរងរបួសគឺជាជនជាតិថៃ នេះបើយោងតាមក្រសួងការបរទេសរបស់ពួកគេ ទោះបីជាទីក្រុងសេអ៊ូលមិនទាន់បញ្ជាក់សញ្ជាតិរបស់ពួកគេក៏ដោយ។
ទាហានត្រូវបានគេរាយការណ៍ថាបានរងរបួសនៅពេលគ្រាប់បែកបីគ្រាប់ធ្លាក់ចូលក្នុងមូលដ្ឋានទ័ពក្បែរនោះ។
រដ្ឋមន្ត្រីក្រសួងការពារជាតិស្តីទីលោក Kim Seon-ho បានសុំទោសចំពោះឧបទ្ទវហេតុនេះ ដោយបានសន្យាថានឹងខិតខំប្រឹងប្រែងដើម្បីស្តារទ្រព្យសម្បត្តិដែលខូចខាត និងផ្តល់សំណង៕