ព្រះអង្គម្ចាស់ Alwaleed bin Khaled bin Talal Al Saud ដែលគេស្គាល់ថាជា Sleeping Prince របស់អារ៉ាប៊ីសាអូឌីត បានសោយទិវង្គត។
ក្នុងព្រះជន្ម ៣៦ព្រះវស្សា កាលពីថ្ងៃសៅរ៍ ទី១៩ ខែកក្កដា ឆ្នាំ២០២៥ ក្រោយសន្លប់អស់រយៈពេលជិត២០ ឆ្នាំ។
ប្រភពពីសារព័ត៌មាន BBC ។
ព្រះអង្គម្ចាស់ Alwaleed bin Khaled bin Talal Al Saud បានសន្លប់ តាំងពីជួបគ្រោះថ្នាក់ចរាចរណ៍ដ៏ធ្ងន់ធ្ងរមួយនៅទីក្រុងឡុងដ៍ កាលពីឆ្នាំ២០០៥ នៅពេលដែលព្រះអង្គមានព្រះជន្មត្រឹមតែ ១៥ ព្រះវស្សា។
គ្រោះថ្នាក់បានបណ្តាលឲ្យព្រះអង្គរងរបួសខួរក្បាលធ្ងន់ធ្ងរ និងហូរឈាមខាងក្នុង។
ទោះបីជាបានទទួលការព្យាបាលយ៉ាងយកចិត្តទុកដាក់បំផុត ពីអ្នកឯកទេសទូទាំងពិភពលោកក៏ដោយ ក៏ព្រះអង្គមិនអាចដឹងខ្លួនពេញលេញឡើងវិញបានឡើយ។
ព្រះអង្គនៅតែបន្តទទួលការជួយសង្គ្រោះពីម៉ាស៊ីន នៅមន្ទីរពេទ្យ King Abdulaziz Medical City ក្នុងទីក្រុងរីយ៉ាដ។
ព្រះបិតារបស់ព្រះអង្គ គឺព្រះអង្គម្ចាស់ Khaled bin Talal Al Saud បានបដិសេធមិនដកព្រះអង្គចេញពីម៉ាស៊ីនជួយសង្គ្រោះឡើយ ។
ដោយរក្សាក្តីសង្ឃឹមថា ព្រះអង្គនឹងអាចជាសះស្បើយឡើងវិញ ហើយបានមានបន្ទូលថា មានតែព្រះជាម្ចាស់ទេ ដែលជាអ្នកកំណត់ពេលវេលានៃការសោយទិវង្គត។
ប៉ុន្មានឆ្នាំកន្លងមក មានរបាយការណ៍ម្តងម្កាល និងវីដេអូបង្ហាញពីចលនាបន្តិចបន្តួច ដូចជាព្រះអង្គម្ចាស់លើកម្រាមដៃជាដើម ដែលបានរក្សាក្តីសង្ឃឹមរបស់ក្រុមគ្រួសារ។
យ៉ាងណាក្តីព្រះអង្គ បានសោយទិវង្គតកាលពីថ្ងៃសៅរ៍ទី១៩ ខែកក្កដា ឆ្នាំ ២០២៥៕