កាលពីថ្ងៃព្រហស្បតិ៍ទី២៨ សីហា អ៊ីរ៉ង់ បានថ្កោលទោស ការសម្រេចចិត្ត របស់ បារាំង អាល្លឺម៉ង់ និងចក្រភពអង់គ្លេស (E3) ក្នុងការចាប់ផ្ដើមដំណើរការ “snapback” ដើម្បីដាក់ ទណ្ឌកម្មរបស់អង្គការសហប្រជាជាតិឡើងវិញលើទីក្រុងតេអេរ៉ង់ ពាក់ព័ន្ធនឹងកម្មវិធីនុយក្លេអ៊ែររបស់ខ្លួន។
ប្រភពពីសារព័ត៌មានAANews។
ក្រសួងការបរទេសអ៊ីរ៉ង់ បានចេញសេចក្តីថ្លែងការណ៍ថា ការប៉ុនប៉ងរបស់ E3 មិនសមស្របនឹងដំណោះស្រាយលេខ 2231 របស់ក្រុមប្រឹក្សាសន្តិសុខអង្គការសហប្រជាជាតិ និង ត្រូវបានចាត់ទុកជាមោឃៈតាមច្បាប់។
លោក Abbas Araghchi រដ្ឋមន្ត្រីការបរទេសអ៊ីរ៉ង់ បានថ្កោលទោសការចាត់ចែងរបស់អឺរ៉ុបថាមិនសមហេតុផល ខុសច្បាប់ និងខ្វះមូលដ្ឋានផ្លូវច្បាប់។ គាត់បានបញ្ជាក់ថា អ៊ីរ៉ង់នឹងឆ្លើយតបយ៉ាងត្រឹមត្រូវ និងព្រមានថា វាអាចប៉ះពាល់ដល់កិច្ចសហប្រតិបត្តិការជាមួយ ទីភ្នាក់ងារថាមពលអាតូមិកអន្តរជាតិ (IAEA) ព្រមទាំងបំផ្លាញភាពជឿជាក់នៃក្រុមប្រឹក្សាសន្តិសុខអង្គការសហប្រជាជាតិ។
អឺរ៉ុប E3 បានអះអាងថា ការជូនដំណឹងនេះគឺជាផ្នែកមួយនៃដំណោះស្រាយ 2231 ដើម្បីចាប់ផ្ដើមដំណើរការ snapback ដែលអាចនាំឲ្យទណ្ឌកម្មរបស់អង្គការសហប្រជាជាតិ ដែលបានបញ្ចប់ពីមុន ត្រូវដាក់ឡើងវិញក្រោយរយៈពេល 30 ថ្ងៃ។ ពួកគេអះអាងថា អ៊ីរ៉ង់បានបំពានលើកាតព្វកិច្ចក្រោមកិច្ចព្រមព្រៀង JCPoA (កិច្ចព្រមព្រៀងនុយក្លេអ៊ែរឆ្នាំ 2015)។
គួរបញ្ជាក់ថា កិច្ចព្រមព្រៀងនេះមានគោលបំណងរារាំងអ៊ីរ៉ង់ពីការបង្កើតអាវុធនុយក្លេអ៊ែរ និងកំណត់លក្ខខណ្ឌក្នុងការផ្ទៀងផ្ទាត់កម្មវិធីនុយក្លេអ៊ែរដោយអន្តរជាតិ។