កាលពីថ្ងៃសុក្រ ទី២៩ ខែសីហា ចិនបានចេញសារព្រមានដល់ប្រទេសហ្វីលីពីនអំពីការរំលងបន្ទាត់ក្រហមលើកោះតៃវ៉ាន់ បន្ទាប់ពីមានរបាយការណ៍ថា អ្នកការទូតកំពូលរបស់តៃវ៉ាន់ បានធ្វើទស្សនកិច្ចនៅទីក្រុងម៉ានីល។
ប្រភពពីសារព័ត៌មានAANews
អ្នកនាំពាក្យក្រសួងការបរទេសចិន លោក Guo Jiakun បាននិយាយថាមានតម្លៃដែលត្រូវចំណាយសម្រាប់ការជាន់ឈ្លីខ្សែបន្ទាត់ក្រហមរបស់ប្រទេសចិន ហើយផលវិបាកទាំងអស់នឹងត្រូវហ្វីលីពីនទទួលខុសត្រូវ។
ចិនចោទប្រកាន់ហ្វីលីពីនថា បានផ្តល់វេទិកាឱ្យអ្នកបំបែកខ្លួន ឯករាជ្យតៃវ៉ាន់ ក្នុងសកម្មភាពប្រឆាំងចិន និងបានបំពានយ៉ាងធ្ងន់ធ្ងរលើបទដ្ឋានអន្តរជាតិ។
បើទោះបីជា តៃប៉ិ មិនបានចេញសេចក្តីថ្លែងការណ៍ផ្លូវការ អំពីដំណើរទស្សនកិច្ចរបស់ Lin Chia-lung ទៅម៉ានីលក្តី ក៏តែបានបញ្ជាក់ថា គណៈប្រតិភូធុរកិច្ចកំពុងបំពេញភារកិច្ចនៅហ្វីលីពីន។
ចិនបានធ្វើការតវ៉ាយ៉ាងតឹងរឹងជាមួយម៉ានីល និងបានទាមទារឱ្យគោរពគោលការណ៍ចិនតែមួយដោយចាត់ទុកថា តៃវ៉ាន់ជាផ្នែកមួយមិនអាចកាត់ផ្តាច់បាននៃទឹកដីចិន៕