នៅព្រឹកថ្ងៃអាទិត្យ ទី៣១ សីហា ឆ្នាំ២០២៥ ប្រធានាធិបតីទួរគី លោក Recep Tayyip Erdogan បានមកដល់ប្រទេសចិន ដើម្បីចូលរួមកិច្ចប្រជុំកំពូលអង្គការសហប្រតិបត្តិការសៀងហៃ (SCO) ជាភ្ញៀវកិត្តិយស។
ប្រភពពីសារព័ត៌មានAnadolu។
លោក Erdogan ត្រូវបានអមដំណើរដោយស្ត្រីទីមួយ Emine Erdogan រដ្ឋមន្ត្រីការបរទេស លោក Hakan Fidan និងប្រធានចារកម្ម Ibrahim Kalin។ គាត់ត្រូវបានអញ្ជើញស្វាគមន៍នៅអាកាសយានដ្ឋានអន្តរជាតិ Binhai ដោយមន្ត្រីជាន់ខ្ពស់របស់រដ្ឋាភិបាលចិន និងឯកអគ្គរដ្ឋទូតទួរគីប្រចាំទីក្រុងប៉េកាំង។
ក្នុងកិច្ចប្រជុំកំពូលនេះ ប្រធានាធិបតី Erdogan នឹងថ្លែងសុន្ទរកថាដើម្បីបើកសម័យប្រជុំ និងជួបពិភាក្សាទ្វេភាគីជាមួយប្រធានាធិបតីចិន លោក Xi Jinping ព្រមទាំងមេដឹកនាំជាតិផ្សេងៗ។
កិច្ចប្រជុំ SCO លើកទី២៥ នេះ ត្រូវបានរៀបចំក្នុងពេលដែលមានភាពតានតឹងភូមិសាស្ត្រនយោបាយកើនឡើង ដូចជា សង្គ្រាមអ៊ុយក្រែន និងវិបត្តិក្នុងតំបន់មជ្ឈិមបូព៌ា។
អង្គការសហប្រតិបត្តិការសៀងហៃ ត្រូវបានបង្កើតឡើងចាប់ពីឆ្នាំ ២០០១ និងមានសមាជិកសរុបចំនួន១០ ប្រទេស ដែលគ្របដណ្តប់ ៤២% នៃប្រជាជនពិភពលោក។ Türkiye ជាដៃគូសន្ទនាមួយក្នុងអង្គការ៕