នៅថ្ងៃពុធ ទី៣ ខែកញ្ញា ឆ្នាំ២០២៥ ព្រឹត្តិការណ៍មួយដែលបង្កការចាប់អារម្មណ៍បានកើតឡើង ខណៈដែលប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី ជីនពីង បានដើរចូលរួមក្នុងក្បួនដង្ហែរយោធា ប្រារព្ធខួបលើកទី៨០ នៃការបញ្ចប់សង្គ្រាមលោកលើកទីពីរ នៅទីក្រុងប៉េកាំង។
ប្រភពពីសារព័ត៌មានCNA។
មីក្រូហ្វូនចល័តមួយបានថតសំឡេងពិភាក្សារបស់មេដឹកនាំទាំងពីរ ដែលពាក់ព័ន្ធនឹងប្រធានបទពិសេសអំពី ការប្តូរសរីរាង្គ និងសក្តានុពលនៃអាយុកាលរហូតដល់ ១៥០ ឆ្នាំ។ ក្នុងពេលដែលពួកគេដើរជាមួយមេដឹកនាំកូរ៉េខាងជើង លោក គីម ជុងអ៊ុន អ្នកបកប្រែរបស់លោកពូទីនអាចត្រូវបានឮថ្លែងជាភាសាចិនថាបច្ចេកវិទ្យាជីវសាស្រ្តកំពុងអភិវឌ្ឍជាបន្តបន្ទាប់។
កិច្ចពិភាក្សាល្ងាចនោះបានកើតឡើងទោះបីជាមិនមានការរំពឹងទុកជាមុនក្តី ព្រោះតែការផ្សាយបន្តផ្ទាល់របស់ទូរទស្សន៍រដ្ឋចិន CCTV បានចែកចាយទៅកាន់ប្រព័ន្ធផ្សព្វផ្សាយអន្តរជាតិ ដូចជា AP និង Reuters។ រដ្ឋបាលវិទ្យុ និងទូរទស្សន៍ចិន (NRTA) បានអះអាងថា ព្រឹត្តិការណ៍នេះមានអ្នកទស្សនាជាង ១.៩ ពាន់លាននាក់តាមអ៊ីនធឺណិត និងជាង ៤០០ លាននាក់តាមទូរទស្សន៍។
ពេលវេលាដែលមើលទៅដូចជាការបង្ហាញភាពជិតស្និទ្ធ និងការពិភាក្សានៅក្រោយឆាករបស់មេដឹកនាំមហាអំណាចទាំងពីរ បង្ហាញឱ្យឃើញថា ក្រៅពីការទូត និងយុទ្ធសាស្ត្រទូទៅ ពួកគេក៏មានចំណាប់អារម្មណ៍លើ អនាគតបច្ចេកវិទ្យាជីវសាស្រ្ត និងការរស់យូរ។
ទោះបីជាមិនទាន់មានការផ្តល់ពត៌មានបន្ថែមពីរដ្ឋាភិបាលទាំងពីរក៏ដោយ ការចាប់សំឡេងនេះ បានបន្ថែមទស្សនៈថ្មីលើទំនាក់ទំនងរវាងប៉េកាំង និងម៉ូស្គូ ដែលអាចនាំឱ្យមានការចាប់អារម្មណ៍ផ្នែកវិទ្យាសាស្រ្ត និងសង្គមជាថ្មី៕