រដ្ឋមន្ត្រីការបរទេសកូរ៉េខាងត្បូង លោក Cho Hyun បាននិយាយកាលពីថ្ងៃចន្ទទី១៥ខែកញ្ញា ថាទីក្រុងសេអ៊ូល នឹងពិចារណាយ៉ាងម៉ត់ចត់នូវមធ្យោបាយ ដើម្បីជួយអ៊ុយក្រែន កសាងឡើងវិញបន្ទាប់ពីសង្គ្រាម។
ប្រភពពីសារព័ត៌មាន Yonhap News។
លោក Cho បានធ្វើការកត់សម្គាល់ក្នុងអំឡុងពេលសន្ទនាតាមទូរស័ព្ទជាលើកដំបូងជាមួយរដ្ឋមន្ត្រីការបរទេសអ៊ុយក្រែន លោក Andrii Sybiha ដែលក្នុងនោះអ្នកទាំងពីរបានពិភាក្សាអំពីទំនាក់ទំនងទ្វេភាគី និងស្ថានភាពក្នុងតំបន់។
លោក Cho បានបង្ហាញពីចំណាប់អារម្មណ៍របស់ទីក្រុងសេអ៊ូលក្នុងការអភិវឌ្ឍន៍កិច្ចចរចាសន្តិភាពចំពេលមានជម្លោះរុស្ស៊ី-អ៊ុយក្រែន។
លោកបាននិយាយថា កូរ៉េខាងត្បូងកំពុងតាមដានយ៉ាងដិតដល់នូវស្ថានការណ៍នៅក្នុងតំបន់ ហើយនឹងពិចារណាយ៉ាងម៉ត់ចត់នូវមធ្យោបាយដើម្បីជួយដល់ការកសាងឡើងវិញក្រោយសង្គ្រាមបញ្ចប់។
លោក Sybiha បានថ្លែងអំណរគុណដល់ទីក្រុងសេអ៊ូលសម្រាប់ការបន្តគាំទ្រដល់ទីក្រុង Kyiv។
អ្នកការទូតកំពូលទាំងពីរក៏បានពិភាក្សាអំពីការវិវឌ្ឍន៍ចុងក្រោយបង្អស់នៅក្នុងប្រទេសអ៊ុយក្រែន ក៏ដូចជាការឆ្លើយតបរបស់សហគមន៍អន្តរជាតិផងដែរ។
ពួកគេក៏បានសន្យាថានឹងរក្សាទំនាក់ទំនងជិតស្និទ្ធក្នុងអំឡុងពេលកិច្ចប្រជុំពហុភាគីនាពេលខាងមុខ រួមទាំងមហាសន្និបាតអង្គការសហប្រជាជាតិនៅចុងខែនេះ៕