នៅថ្ងៃទី២ខែតុលា ក្នុងពេលដែលសហរដ្ឋអាមេរិកកំពុងប្រឈមមុខនឹងការបិទរដ្ឋាភិបាល ក្រុមអ្នកសាធារណរដ្ឋ (GOP) បានបន្តបញ្ចេញសារទូទៅសម្រាប់អ្នកបោះឆ្នោតថា គណបក្សប្រជាធិបតេយ្យកំពុងបិទរដ្ឋាភិបាល ដើម្បីផ្តល់អត្ថប្រយោជន៍សុខភាពដល់ជនអន្តោប្រវេសន៍ខុសច្បាប់។
ប្រភពពីសារព័ត៌មានNBC។
សារនេះត្រូវបានផ្សាយពាណិជ្ជកម្មដោយគណៈកម្មាធិការសភាសាធារណរដ្ឋ និងបានបន្តចែករំលែកដោយសមាជិកសភា GOP និងរដ្ឋបាល Trump។ អនុប្រធាន JD Vance បានអះអាងលើកម្មវិធី Fox News ថា វិក័យប័ត្រដែលគណបក្សរបស់គាត់បានដាក់ជាដំណោះស្រាយបានបិទការផ្តល់មូលនិធិសុខភាពសម្រាប់ជនបរទេសខុសច្បាប់។
ទោះជាយ៉ាងណា តាមច្បាប់សហរដ្ឋអាមេរិកបច្ចុប្បន្ន ជនអន្តោប្រវេសន៍ដែលគ្មានឯកសារ មិនអាចទទួលបានអត្ថប្រយោជន៍ថែទាំសុខភាពសហព័ន្ធ ដូចជា Medicare ឬ Medicaid ឡើយ។ អ្វីដែលអ្នកប្រជាធិបតេយ្យបានលើកឡើងក្នុងវិក័យប័ត្ររដ្ឋបាលរបស់ពួកគេ គឺផ្តល់ឱកាសសម្រាប់ អ្នកដែលមានវត្តមានស្របច្បាប់ មួយចំនួន ដូចជា អ្នកទទួលការការពារកុមារចូលប្រទេស (DACA recipients) និង អ្នកស្វែងរកសិទ្ធិជ្រកកោន។
និយាយច្បាស់ៗ គណបក្សប្រជាធិបតេយ្យមិនបានស្នើឱ្យផ្តល់សេវាសុខាភិបាលឥតគិតថ្លៃដល់ជនអន្តោប្រវេសន៍ដែលគ្មានឯកសារឡើយ ប៉ុន្តែបានពង្រឹងសិទ្ធិដល់អ្នកដែលមានស្ថានភាពស្របច្បាប់ និងមានការពារតាមច្បាប់។
ការបង្ហោះសារបែបនេះមកក្នុងពេលស្នើវិក័យប័ត្រដើម្បីបើករដ្ឋាភិបាលឡើងវិញ ក៏ត្រូវបានយល់ថាជាវិធីសាស្រ្តនយោបាយរបស់ GOP ដើម្បីបង្កើនសម្ពាធលើគណបក្សប្រជាធិបតេយ្យ និងបង្កើតចំណុចនិយាយក្នុងការប្រកួតបោះឆ្នោត៕