អ្នកចរចាមកពីក្រុមហាម៉ាស់ និងអ៊ីស្រាអែលបានចូលរួមក្នុងកិច្ចចរចាដោយប្រយោលនៅក្នុងប្រទេសអេហ្ស៊ីប លើសំណើរបស់ប្រធានាធិបតីអាមេរិក លោក ដូណាល់ ត្រាំ ដើម្បីបញ្ចប់សង្គ្រាមនៅហ្គាហ្សា។
ប្រភពពីសារព័ត៌មានAljazeera។
សារព័ត៌មាន Al-Qahera ដែលត្រូវបានផ្សារភ្ជាប់ទៅនឹងចារកម្មរដ្ឋអេហ្ស៊ីប បាននិយាយថា គណៈប្រតិភូដែលបានប្រមូលផ្តុំនៅរមណីយដ្ឋានសមុទ្រក្រហម Sharm el-Sheikh កាលពីថ្ងៃចន្ទ “កំពុងពិភាក្សាអំពីការរៀបចំលក្ខខណ្ឌមូលដ្ឋានសម្រាប់ការដោះលែងអ្នកជាប់ឃុំ និងអ្នកទោស” ស្របតាមផែនការរបស់សហរដ្ឋអាមេរិក។
សារព័ត៌មានបានរាយការណ៍ថា អ្នកសម្រុះសម្រួលអេហ្ស៊ីប និងកាតាកំពុងធ្វើការជាមួយភាគីទាំងពីរដើម្បីបង្កើតយន្តការមួយ” សម្រាប់ការផ្លាស់ប្តូរនោះផងដែរ។
មន្ត្រីប៉ាឡេស្ទីនដែលស្និទ្ធនឹងការចរចាបាននិយាយថា កិច្ចពិភាក្សាដំបូងបានបញ្ចប់នៅល្ងាចថ្ងៃច័ន្ទ ហើយការពិភាក្សាជាច្រើនទៀតគ្រោងនឹងធ្វើឡើងនៅថ្ងៃអង្គារ នេះបើយោងតាមទីភ្នាក់ងារសារព័ត៌មានរ៉យទ័រ។
កិច្ចពិភាក្សាដែលធ្វើឡើងនៅមុនថ្ងៃគម្រប់ខួបលើកទី២ នៃការវាយប្រហាររបស់ពួកហាម៉ាស់ កាលពីថ្ងៃទី៧ ខែតុលា ឆ្នាំ២០២៣ ទៅលើអ៊ីស្រាអែល និងការចាប់ផ្តើមសង្គ្រាមរបស់អ៊ីស្រាអែលលើតំបន់ហ្គាហ្សា បានបង្កើនក្តីសង្ឃឹមថា ជម្លោះដែលបានសម្លាប់មនុស្សរាប់ម៉ឺននាក់នៅហ្គាហ្សា អាចនឹងត្រូវបញ្ចប់ក្នុងពេលឆាប់ៗនេះ។
ប៉ុន្តែ មានឧបសគ្គដែលអាចកើតមានជាច្រើនក្នុងការចុះកិច្ចព្រមព្រៀង ហើយអ៊ីស្រាអែលបានបន្តសម្លាប់ជនជាតិប៉ាឡេស្ទីននៅតំបន់ហ្គាហ្សា ដោយមានការរាយការណ៍ថាបានសម្លាប់មនុស្ស 10 នាក់កាលពីថ្ងៃចន្ទ នេះបើយោងតាមប្រភព Al Jazeera ។
គួរជម្រាបថា ការស្លាប់ចុងក្រោយបង្អស់នៅតំបន់ហ្គាហ្សា នាំឱ្យចំនួនមនុស្សស្លាប់សរុបក្នុងការវាយប្រហាររបស់អ៊ីស្រាអែលកើនឡើងដល់ 104 នាក់ ចាប់តាំងពីថ្ងៃសុក្រ នៅពេលដែលប្រធានាធិបតី Trump បានអំពាវនាវឱ្យអ៊ីស្រាអែលបញ្ឈប់ការទម្លាក់គ្រាប់បែកលើទឹកដីប៉ាឡេស្ទីន ដើម្បីឱ្យកិច្ចពិភាក្សាអាចបញ្ចប់ ប៉ុន្តែការវាយប្រហារបានបន្តពេញទឹកដី៕