(ភ្នំពេញ)៖ សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ នៃព្រះរាជាណាចក្រកម្ពុជា បានព្រះរាជទានសារលិខិត ជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
សម្តេចព្រះមហាក្សត្រី ខ្ញុំមានសេចក្តីរំភើបរីករាយ សូមចូលរួមអបអរសាទរ ចំពោះសម្តេចមហាបវរធិបតី ដែល ទទួលបានពានរង្វាន់ ភាពជាអ្នកដឹកនាំឆ្នើមពិភពលោក ពីវិទ្យាស្ថានយុទ្ធសាស្ត្រសម្រាប់តំបន់ អាស៊ីប៉ាស៊ីហ្វិក (KSI) នាព្រឹកថ្ងៃអង្គារ ទី២៦ ខែវិច្ឆិកា ឆ្នាំ២០២៤ ។
សម្តេចមហាបវរធិបតី ពិតជាស័ក្តិសមទទួលបានពានរង្វាន់ ភាពជាអ្នកដឹកនាំឆ្នើមពិភព លោក” ដែលជាថ្នាក់ដឹកនាំវ័យក្មេង ពោរពេញដោយសមត្ថភាព បញ្ញាញាណ និងថាមពល បាន ប្តេជ្ញាចិត្តយ៉ាងមុតមាំក្នុងការកសាងនីតិរដ្ឋលទ្ធិប្រជាធិបតេយ្យ ពង្រឹងខឿនសេដ្ឋកិច្ចជាតិ សេវា សង្គម និងការអភិវឌ្ឍលើគ្រប់វិស័យជាពិសេសបានចូលរួមចំណែកយ៉ាងសកម្ម ដើម្បីបុព្វហេតុ ជាតិមាតុភូមិ ប្រជាជនកម្ពុជា និងបន្តពូនជ្រំថែទាំយ៉ាងដិតដល់នូវសេចក្តីសុខ សន្តិភាព ស្ថិរភាព នយោបាយប្រកបដោយស័ក្តិសិទ្ធិភាព នៅគ្រប់ដំណាក់កាល ។
ខ្ញុំសូមជូនពរ សម្តេចមហាបវរធិបតី និង លោកជំទាវបណ្ឌិត ព្រមទាំងបុត្រា-បុត្រីទាំងអស់ សូមបានប្រកបតែនឹងព្រះពុទ្ធពរគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
សូម សម្តេចមហាបវរធិបតី ទទួលនូវសេចក្ដីរាប់អានដ៏ខ្ពង់ខ្ពស់បំផុត អំពីខ្ញុំ ៕