មេដឹកនាំរដ្ឋាភិបាលបណ្តោះអាសន្នបាននិយាយកាលពីថ្ងៃសុក្រ(ទី៤ខែមេសា)ថាប្រទេសមីយ៉ាន់ម៉ាបានកំណត់អត្តសញ្ញាណសមាជិកចំនួន 180,000 នៃជនភៀសខ្លួនរ៉ូហ៊ីងយ៉ាដែលរស់នៅក្នុងប្រទេសបង់ក្លាដែសថាមានសិទ្ធិសម្រាប់ការធ្វើមាតុភូមិនិវត្តន៍។
ប្រភពពីសារព័ត៌មានAljazeera។
លោក Muhammad Yunus ប្រមុខរដ្ឋាភិបាលបណ្តោះអាសន្នបង់ក្លាដែសបាននិយាយថា “អាជ្ញាធរមីយ៉ាន់ម៉ាបានបញ្ជាក់ទៅកាន់ប្រទេសបង់ក្លាដែសថា ក្នុងចំណោមបញ្ជីនៃជនជាតិរ៉ូហ៊ីងយ៉ាចំនួន 800,000 នាក់ដែលជ្រកកោនក្នុងប្រទេសបង់ក្លាដែស ពួកគេបានកំណត់អត្តសញ្ញាណជនជាតិរ៉ូហ៊ីងយ៉ាចំនួន 180,000 នាក់ដែលមានសិទ្ធិត្រឡប់ទៅមីយ៉ាន់ម៉ាវិញ” ។
ប្រទេសបង់ក្លាដែសកំពុងទទួលជនភៀសខ្លួនរ៉ូហ៊ីងយ៉ាជាង 1.3 លាននាក់នៅ Cox’s Bazar ដែលបានភៀសខ្លួនចេញពីការបង្រ្កាបរបស់មីយ៉ាន់ម៉ាក្នុងឆ្នាំ 2017 ។
លោក Yunus បានធ្វើសេចក្តីថ្លែងការណ៍នៅលើ X ក្នុងអំឡុងដំណើររបស់គាត់ទៅកាន់ប្រទេសថៃ ជាកន្លែងដែលគាត់បានចូលរួមក្នុងកិច្ចប្រជុំកំពូល Bay of Bengal Initiative for Multi-Sectoral Technical and Economic Cooperation (BIMSTEC) នៅទីក្រុងបាងកក។
មេដឹកនាំរដ្ឋប្រហារយោធាភូមា លោក Min Aung Hlaing ក៏បានចូលរួមកិច្ចប្រជុំកំពូលផងដែរ។
ចំនួនសមាជិករ៉ូហ៊ីងយ៉ាដែលបានកំណត់អត្តសញ្ញាណ មានសិទ្ធិសម្រាប់ការវិលត្រឡប់មកវិញត្រូវបានបង្ហាញកាលពីថ្ងៃសុក្រទៅកាន់ទីប្រឹក្សារបស់ Yunus លោក Khalilur Rahman ដោយលោក U Than Shew រដ្ឋមន្ត្រីការបរទេសមីយ៉ាន់ម៉ានៅទីក្រុងបាងកក។
គួរជម្រាបថា ជនជាតិរ៉ូហ៊ីងយ៉ាគឺជាជនជាតិដើមនៃរដ្ឋរ៉ាឃីនក្នុងប្រទេសមីយ៉ាន់ម៉ា ប៉ុន្តែរបបជាបន្តបន្ទាប់នៅក្នុងប្រជាជាតិអាស៊ីអាគ្នេយ៍ដែលមានពុទ្ធសាសនិកភាគច្រើនបានបដិសេធពួកគេនូវភាពជាពលរដ្ឋរបស់ប្រទេសក្នុងចំណោមសិទ្ធិផ្សេងទៀត៕