នៅថ្ងៃសៅរ៍ ទី៣០ សីហា ២០២៥ មនុស្សជិតកន្លះលាននាក់ ត្រូវបានជម្លៀសចេញក្រោមស្ថានភាពទឹកជំនន់ធ្ងន់ធ្ងរ នៅភាគខាងកើតប្រទេសប៉ាគីស្ថាន បន្ទាប់ពីភ្លៀងធ្លាក់ខ្លាំងជាច្រើនថ្ងៃ បានបណ្តាលឱ្យទន្លេហូរឡើងលើសកម្រិត ហើយជន់លិចភូមិជាច្រើន។
ប្រភពពីសារព័ត៌មានCNA។
ទន្លេឆ្លងព្រំដែនចំនួនបី ដែលហូរឆ្លងកាត់ខេត្ត Punjab បានកើនឡើងដល់កម្រិតគ្រោះថ្នាក់ បណ្តាលឱ្យភូមិជាង ២,៣០០ត្រូវបានទឹកលិច។
លោក Nabeel Javed ប្រធានសេវាសង្គ្រោះរបស់រដ្ឋាភិបាលខេត្ត Punjab បាននិយាយថា ប្រជាជនជាង ៤៨១,០០០ នាក់ ត្រូវបានជម្លៀសចេញ ដើម្បីជៀសផុតពីទឹកជំនន់។ ក៏ដូចជាសត្វពាហនៈជាង ៤០៥,០០០ ក្បាល ត្រូវបាននាំចេញផងដែរ។
សរុបមក មនុស្សជាង ១.៥ លាននាក់ បានរងផលប៉ះពាល់ដោយទឹកជំនន់នេះ។ រូបភាពដែលផ្តល់ដោយ AFP បង្ហាញឱ្យឃើញប្រជាពលរដ្ឋជាមួយសត្វពាហនៈរបស់ពួកគេ កំពុងអង្គុយលើទូក ដើម្បីជម្លៀសខ្លួនចេញពីតំបន់ Multan បន្ទាប់ពីទឹកទន្លេ Chenab កើនឡើងយ៉ាងខ្លាំង។
អាជ្ញាធរបានព្រមានថា ការបន្តភ្លៀងធ្លាក់អាចធ្វើឱ្យស្ថានភាពកាន់តែធ្ងន់ធ្ងរ និងនាំឱ្យមានការជម្លៀសប្រជាជនបន្ថែមទៀត៕