នៅថ្ងៃសៅរ៍ ទី៣០ សីហា ២០២៥ ការវាយប្រហាររបស់កងទ័ពអ៊ីស្រាអែល បានសម្លាប់ជនជាតិប៉ាឡេស្ទីន៩នាក់ទៀតនៅក្នុងតំបន់ហ្គាហ្សា។
ប្រភពពីសារព័ត៌មានAnadolu Agency។
កងទ័ពអ៊ីស្រាអែល បានបើកប្រតិបត្តិការវាយឆ្មក់ជាបន្តបន្ទាប់ ទៅលើសង្កាត់ Zeitoun និង Sheikh Radwan។
សារព័ត៌មានប៉ាឡេស្ទីន Wafa បញ្ជាក់ថា មានមនុស្ស ៥ នាក់ ស្លាប់ក្នុងការវាយប្រហារផ្ទះគ្រួសារមួយនៅជំរុំ Nuseirat ភាគខាងត្បូង។ មនុស្ស ២ នាក់ ស្លាប់ក្នុងការវាយលុកផ្ទះល្វែងនៅតំបន់ Al-Karama ខាងជើង ហើយមនុស្សម្នាក់ទៀតស្លាប់នៅពេលបំផ្ទុះគ្រាប់បែកលើអគារ Shawa និង Hosari នៅផ្លូវ Al-Wihda។
ប្រភពវេជ្ជសាស្ត្របានប្រាប់ Anadolu ថា កុមារម្នាក់ក៏បានស្លាប់ក្នុងការទម្លាក់គ្រាប់បែកនៅច្រកចូល Deir al-Balah ខេត្តកណ្តាល។
អ៊ីស្រាអែលបានប្រកាសថាទីក្រុងហ្គាហ្សា ជា តំបន់ប្រយុទ្ធដ៏គ្រោះថ្នាក់ហើយបន្តការទម្លាក់គ្រាប់បែកតាំងពីដើមសប្តាហ៍មុន។
តាមរបាយការណ៍អង្គការសិទ្ធិមនុស្ស អ៊ីស្រាអែលបានសម្លាប់ជនប៉ាឡេស្ទីនជាង ៦៣,០០០ នាក់ ចាប់តាំងពីខែតុលា ឆ្នាំ២០២៣។ ការវាយប្រហារបានបំផ្លិចបំផ្លាញហេដ្ឋារចនាសម្ព័ន្ធស៊ីវិលយ៉ាងទូលំទូលាយ និងបង្កគ្រោះទុរ្ភិក្សដល់ប្រជាជន។
កាលពីខែវិច្ឆិកា ឆ្នាំ២០២៤ តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួននាយករដ្ឋមន្ត្រីអ៊ីស្រាអែល Benjamin Netanyahu និងអតីតរដ្ឋមន្ត្រីការពារជាតិ Yoav Gallant ពីបទឧក្រិដ្ឋកម្មសង្រាម និងឧក្រិដ្ឋកម្មប្រឆាំងមនុស្សជាតិ។ ពេលនេះអ៊ីស្រាអែលក៏កំពុងប្រឈមមុខនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិ (ICJ) ផងដែរ៕