ការិយាល័យអន្តោប្រវេសន៍ខេត្តស្រះកែវ បានប្រកាសតាមទំព័រ Facebook ផ្លូវការថា ចាប់ពីថ្ងៃទី ៣១ ខែសីហា ឆ្នាំ ២០២៥ តទៅច្រកព្រំដែន Baan Khlong Luek ក្នុងស្រុកអារញ្ញប្រាថេត ខេត្តស្រះកែវ នឹងបើកជាផ្លូវការ រៀងរាល់ថ្ងៃពុធ និងថ្ងៃអាទិត្យ ពេលម៉ោង ១៣:០០ ដល់ ១៦:០០ ដើម្បីអនុញ្ញាតឲ្យពលរដ្ឋខ្មែរ-ថៃធ្វើដំណើរត្រឡប់ទៅស្រុកកំណើត។
ប្រភពពីសារព័ត៌មានKhaosod។
ក្នុងការប្រកាសបានបញ្ជាក់ថា សេវាកម្មពិសេសនេះ គឺមានគោលបំណងសម្រាប់ពលរដ្ឋទាំងពីរប្រទេសដែលត្រូវការធ្វើដំណើរទៅវិញទៅមក តាមរយៈច្រកព្រំដែននេះ ខណៈដែលច្រកព្រំដែនផ្សេងទៀតនៅតែបិទដដែល។
ទោះជាយ៉ាងណា ការបើកសេវាកម្មនេះកំពុងជួបការរិះគន់យ៉ាងខ្លាំង ព្រោះតំបន់ព្រំដែនក្បែរច្រក Baan Khlong Luek គឺជាទីតាំងសំខាន់នៃ កាស៊ីណូ និងមជ្ឈមណ្ឌល Call Center ធំៗ ដែលដំណើរការជាប់ព្រំដែនកម្ពុជា-ថៃ។ អ្នកវិភាគ និងប្រជាពលរដ្ឋមួយចំនួនព្រមានថា ការបើកច្រកនេះអាចក្លាយជាឱកាសងាយស្រួលសម្រាប់ក្រុមលេងល្បែង ថៃ និងបណ្តាញទំនើងធ្វើដំណើរចូល-ចេញទៅក្រុងប៉ោយប៉ែត។
អ្នករិះគន់ក៏បានបញ្ជាក់ថា មន្ត្រីពាក់ព័ន្ធមិនអាចបញ្ជាក់ឲ្យបានច្បាស់ថា អ្នកដំណើរទាំងអស់មានគោលបំណងត្រឡប់ទៅស្រុកកំណើតពិតប្រាកដ ឬកំពុងចូលរួមក្នុងសកម្មភាពល្បែងស៊ីសង និង Call Center ទេ។ ការមិនអាចត្រួតពិនិត្យបានល្អ នេះអាចបង្កឱ្យកើតជាបណ្តាញអំពើពុករលួយក្នុងរដ្ឋបាលព្រំដែន៕