ការរអិលបាក់ដី និងទឹកជំនន់ភ្លាមៗ កាលពីថ្ងៃព្រហស្បតិ៍ បំផ្លាញផ្ទះប្រជាពលរដ្ឋ កប់ផ្លូវ និងរថយន្តជាច្រើននៅតំបន់ភាគខាងត្បូងរដ្ឋកាលីហ្វ័រញ៉ារបស់ប្រទេសអាមេរិក។
ប្រភពពីសារព័ត៌មានCNN នៅថ្ងៃទី២០ខែកញ្ញា។
តំបន់ Oak Glen, Forest Falls និង Potato Canyon ក្នុងខោនធី San Bernardino ត្រូវបានវាយប្រហារយ៉ាងខ្លាំង។ ភក់ និងកំទេចកំទីបានហូរចូលគ្របដណ្តប់ផ្ទះ និងផ្លូវជាច្រើនប្រមាណ 80 ម៉ាយភាគខាងកើតទីក្រុង Los Angeles។
បណ្តាលឲ្យមានការជួយសង្គ្រោះយ៉ាងហត់នឿយ៖ មនុស្ស ១០ នាក់ ក្នុងរថយន្តយ៉ាងតិច ៦ គ្រឿង ត្រូវបានសង្គ្រោះបន្ទាប់ពីជាប់គាំងប្រហែល ១០ ម៉ោង នៅលើផ្លូវលេខ ៣៨ ដែលត្រូវបានបិទដោយភក់ពីរទិស។ សំណាងល្អ គ្មាននរណារងរបួស។
ទោះយ៉ាងណា ក៏មានការបាត់បង់មនុស្ស។ នៅទីក្រុង Barstow ក្មេងប្រុសអាយុ ២ ឆ្នាំ ត្រូវបានស្លាប់ បន្ទាប់ពីបែកចេញពីឪពុកពេលរថយន្តត្រូវទឹកជំនន់លិច។ សពគេត្រូវបានរកឃើញកាលពីថ្ងៃសុក្រ នៅក្នុងតំបន់ Mojave River។
មន្ត្រី Cal Fire San Bernardino បានណែនាំឲ្យអ្នករស់នៅ Oak Glen ជ្រកកោន ប៉ុន្តែមិនមានអ្នករងរបួសបន្ថែម។ ក្រុមវាយតម្លៃកំពុងពិនិត្យផ្ទះ និងទ្រព្យសម្បត្តិដែលរងការខូចខាត ដើម្បីកំណត់ទំហំការបាត់បង់។
ករណីនេះក៏ឆ្លុះបញ្ចាំងពីអតីតភាព។ កាលពីខែកញ្ញា 2022 Oak Glen និង Forest Falls ក៏បានរងរអិលបាក់ដីធំៗ ដោយមានទំនាក់ទំនងទៅនឹង អគ្គីភ័យ El Dorado ឆ្នាំ 2020។ ដីដែលត្រូវភ្លើងឆេះ ធ្វើឲ្យកើនហានិភ័យទឹកជំនន់ និងរអិលបាក់ដី ពេលមានភ្លៀងធ្លាក់។
ក្នុងព្រឹត្តិការណ៍ព្រហស្បតិ៍ មានកន្លែងមួយនៅជិត Forest Falls រាយការណ៍ថា មានភ្លៀងធ្លាក់ ១.៧៧ អ៊ីញក្នុងរយៈពេលតែមួយម៉ោង។ ព្យុះបានប៉ះពាល់ផងដែរទៅតំបន់វាលខ្សាច់ ដោយផ្លូវនៅក្នុង ឧទ្យានជាតិ Death Valley ត្រូវបានទឹក និងកំទេចកំទីគ្រប់ផ្លូវ៕