Category: ពត៌មានអន្តរជាតិ

ទីភ្នាក់ងារស៊ើបការណ៍សម្ងាត់កូរ៉េខាងត្បូង៖ បានឱ្យដឹងកាលពីថ្ងៃសុក្រ​ (ទី១៨ ខែតុលា​)ថា កូរ៉េខាងជើង បានបញ្ជូនកងទ័ពចំនួន១.៥០០នាក់ទៅជួយរុស្ស៊ី។ ក្នុងការបណ្ដុះបណ្ដាល មុននឹងដាក់ពង្រាយទៅកាន់សមរភូមិ នៅអ៊ុយក្រែន ដើម្បីជួយដល់កងទ័ពរុស្ស៊ី…។ នេះបើតាមទីភ្នាក់ងារសារព័ត៌មាន​ Reuters។

រដ្ឋមន្ត្រីការបរទេសរុស្ស៊ី លោក Sergey Lavrov កាលពីថ្ងៃសុក្រ(ទី១៨ខែតុលា) បានអំពាវនាវដល់អគ្គលេខាធិការអង្គការសហប្រជាជាតិ លោក Antonio Guterres ឱ្យក្រោកឈរឡើង ដើម្បីគាំទ្រដល់កងកម្លាំងរក្សាសន្តិភាពរបស់អង្គការសហប្រជាជាតិ នៅក្នុងប្រទេសលីបង់(UNIFIL) ដែលត្រូវអ៊ីស្រាអែល វាយប្រហារ កាលពីសប្តាហ៍មុន..!។

ប្រទេសចិន បានបដិសេធការចោទប្រកាន់របស់អាមេរិក ដែលថាទីក្រុងប៉េកាំង បានផ្គត់ផ្គង់អាវុធដ៏សាហាវ ដល់ប្រទេសរុស្ស៊ី សម្រាប់ប្រើប្រាស់នៅក្នុងប្រទេសអ៊ុយក្រែន។ នេះបើយោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសចិនកាលពីថ្ងៃសុក្រ(ទី១៨ខែតុលា)។

ព្រះរាជអាជ្ញា បាននិយាយថាតុលាការពិសេសមួយក្នុងប្រទេសបង់ក្លា កាលពីថ្ងៃព្រហស្បតិ៍(ទី១៧ ខែតុលា)បានចេញដីកាចាប់ខ្លួនលោកស្រី Sheikh Hasina អតីតនាយករដ្ឋមន្ត្រី ជំនួយការជិតស្និទ្ធបំផុតរបស់លោកស្រីនឹងអ្នកពាក់ព័ន្ធសរុប 45 នាក់ ពីបទសង្ស័យឧក្រិដ្ឋកម្មប្រឆាំងមនុស្សជាតិក្នុងអំឡុងពេលការបះបោរដឹកនាំដោយនិស្សិតក្នុងខែកក្កដា និងសីហា ដែលបានបង្ខំឱ្យលោកស្រី Sheikh Hasina ភៀសខ្លួនទៅកាន់ប្រទេសឥណ្ឌា។ 

ប្រធានាធិបតីអាមេរិកលោក Joe Biden បានទូរស័ព្ទទៅកាន់នាយករដ្ឋមន្ត្រីអ៊ីស្រាអែល Benjamin Netanyahu កាលពីថ្ងៃព្រហស្បតិ៍(ទី១៧ខែតុលា) ដើម្បីអបអរសាទរចំពោះការសម្លាប់ មេដឹកនាំក្រុមហាម៉ាស់ លោក Yahya Sinwar។

កងទ័ពអ៊ីស្រាអែលបានប្រកាសកាលពីថ្ងៃព្រហស្បតិ៍(ទី១៧ ខែតុលា)ថា ខ្លួនបានសម្លាប់មេដឹកនាំក្រុមហាម៉ាស់ Yahya Sinwar នៅក្នុងប្រតិបត្តិការយោធានៅតំបន់ហ្គាហ្សាស្ទ្រីប។

អធិការបតីអាល្លឺម៉ង់ លោក Olaf Scholz កាលពីថ្ងៃព្រហស្បតិ៍(ទី១៧ ខែតុលា)បាននិយាយថា អាល្លឺម៉ង់បន្តផ្គត់ផ្គង់សព្វាវុធដល់អ៊ីស្រាអែល ទោះបីជាមានសង្រ្គាមប្រល័យពូជសាសន៍នៅក្នុងប្រទេសហ្គាហ្សាស្ទ្រីបក៏ដោយ។

ប្រធានកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានគំរាមកាលពីថ្ងៃព្រហស្បតិ៍(ទី១៧ ខែតុលា)ថា នឹងវាយប្រហារលើអ៊ីស្រាអែលម្តងទៀត។

អាហ្រ្វិក បានចុះបញ្ជីអំពីការស្លាប់មនុស្សថ្មីៗនេះចំនួន 50 នាក់កាលពីសប្តាហ៍មុនដោយសារជំងឺអុតស្វា ឬ Mpox ដែលនាំឱ្យចំនួនអ្នកស្លាប់កើនឡើងដល់ 1,100 ចាប់តាំងពីដើមឆ្នាំមក ទិន្នន័យចុងក្រោយបំផុតដោយមជ្ឈមណ្ឌលគ្រប់គ្រង និងការពារជំងឺអាហ្វ្រិក (Africa CDC) បានបង្ហាញកាលពីថ្ងៃព្រហស្បតិ៍(ទី១៧ ខែតុលា)។

អង្គការឃ្លាំមើលសិទ្ធិមនុស្ស (HRW) បាននិយាយកាលពីថ្ងៃព្រហស្បតិ៍(ទី១៧ ខែតុលា)ថា ការប៉ះទង្គិចគ្នាថ្មីៗនេះរវាងកងកម្លាំងរដ្ឋាភិបាលអេត្យូពី និងកងជីវពល Fano ដែលមានមូលដ្ឋាននៅ Amhara បានកើនឡើងកាន់តែខ្លាំងនៅក្នុងតំបន់ភាគពាយ័ព្យនៃប្រទេសអេត្យូពី ដោយបានធ្វើឱ្យជនភៀសខ្លួនស៊ូដង់ រាប់ពាន់នាក់ស្ថិតក្នុងហានិភ័យធ្ងន់ធ្ងរ។