(ភ្នំពេញ)៖ គ្រោះថ្នាក់ចរាចរណ៍ ដោយរថយន្តទំនើបមួយគ្រឿងផ្លាកលេខខេមរភូមិន្ទបើកបរក្នុងល្បឿនលឿនឡើងសួនច្បារចែកផ្លូវជ្រុលបុករះដើមឈើនិងបង្គោលភ្លើង បណ្តាលឱ្យក្រឡាប់ផ្ងារកង់បង្កការភ្ញាក់ផ្អើលស្ថិតនៅតាមបណ្តោយផ្លូវបុរីអង្គរក្នុង សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ កាលពីវេលាម៉ោង១១យប់ ថ្ងៃទី១៦ខែធ្នូឆ្នាំ២០២៤។
ប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុគេបានឃើញរថយន្ត ម៉ាក HYUNDAI GALLOPER ១គ្រឿងផ្លាកលេខ ខេមរភូមិន្ទ02 2-1032 បើកបរក្នុងល្បឿនលឿនតាមបណ្តោយផ្លូវបុរីអង្គរ ទិសដៅពីត្បូងទៅជើង ចេញពីកាំកូស៊ីធី ទៅកាន់បុរីអង្គរ លុះមកដល់ចំណុចកើតហេតុរថយន្តខាងលើស្រាប់តែរេចង្កូតជ្រុលទៅឡើងខឿនសួនចែកផ្លូវ រួចក៏បានបុកដើមឈើ១ដើម និងបង្គោលភ្លើងបាក់រលំអស់១ដើម ទើបរថយន្តបង្កក្រឡាប់ កាត់ទទឹងផ្លូវតែម្តង។
ប្រភពដដែលបានបន្តថា ក្រោយបង្កហេតុគេបានឃើញបុរសម្នាក់ចេញពីក្នុងរថយន្តដែលកំពុងក្រឡាប់នោះ រួចបន្ទាប់មកក៏បានគេចខ្លួនចេញពីទីតាំងកើតហេតុបាត់។ករណីគ្រោះថ្នាចរាចរណ៍នេះមិនបានបង្កគ្រោះថ្នាក់ដល់អ្នកដំណើរផ្សេងទៀតទេ។
ក្រោយកើតហេតុសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាចធានីភ្នំពេញ៕