Category: ពត៌មានអន្តរជាតិ

ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ បានប្រកាសកាលពីថ្ងៃព្រហស្បតិ៍(ទី១៤ខែវិច្ឆិកា)ថា រុស្ស៊ីបើកចំហចំពោះការចរចាស្តីពីការបញ្ចប់សង្រ្គាមអ៊ុយក្រែន ប្រសិនបើមានការផ្តួចផ្តើមពីប្រធានាធិបតីជាប់ឆ្នោត ដូណាល់ ត្រាំ។ ប្រភពពីសារព័ត៌មាន Reuters នៅថ្ងៃទី១៤ ខែវិច្ឆិកា ឆ្នាំ២០២៤។

មន្ត្រីជាន់ខ្ពស់ក្រុមហាម៉ាស់ នៅថ្ងៃសុក្រ(ទី១៥ខែវិច្ឆិកា)បានប្រកាសថា ក្រុមហាម៉ាស់ត្រៀមខ្លួនរួចជាស្រេចសម្រាប់បទឈប់បាញ់នៅតំបន់ហ្គាហ្សា និងបានអំពាវនាវឱ្យប្រធានាធិបតីអាមេរិកដែលទើបជាប់ឆ្នោតថ្មី លោក ដូណាល់ ត្រាំ ដាក់សម្ពាធលើអ៊ីស្រាអែលឱ្យបញ្ចប់សង្រ្គាមនេះ។ ប្រភពពីសារព័ត៌មាន AFP។

លោក Anura Kumara Dissanayake មេដឹកនាំគណបក្សប្រធានាធិបតីស្រីលង្កា គ្រប់គ្រងលើក្រុមបក្សចម្រុះឆ្វេងនិយមទទួលបានជ័យជម្នះយ៉ាងធំសម្បើម ក្នុងការបោះឆ្នោតសភាដោយទទួលបានអាសនៈគ្រប់គ្រាន់ ដើម្បីអនុវត្តផែនការកាត់បន្ថយភាពក្រីក្រ និងប្រយុទ្ធប្រឆាំងអំពើពុករលួយ នៅក្នុងប្រទេសកោះដែលកំពុងងើបឡើងវិញពីវិបត្តិហិរញ្ញវត្ថុមួយនេះ។

តុលាការប្រទេសកូរ៉េខាងត្បូង នៅថ្ងៃសុក្រ (ទី១៥ ខែវិច្ឆិកា)នេះ បានផ្តន្ទាទោសមេដឹកនាំគណបក្សប្រឆាំង លោក Lee Jae-myung ដាក់ពន្ធនាគាររយ:ពេល១ឆ្នាំ ជាមួយការព្យួរទោសរយៈពេល២ឆ្នាំ ពីបទបំពានច្បាប់បោះឆ្នោត ហើយបើមិនមានអ្វីប្រែប្រួលទេ វាអាចបំផ្លាញដល់ការប៉ុនប៉ងរបស់លោកដែលចង់ឈរឈ្មោះចូលរួម ប្រកួតប្រជែងក្នុងការបោះឆ្នោតប្រធានាធិបតីនៅឆ្នាំ២០២៧។

យោងតាមព័ត៌មាន Anadolu នៅលើដីបានឱ្យដឹងថា កងទ័ពអ៊ីស្រាអែលបានធ្វើការវាយប្រហារតាមអាកាសចំនួនពីរនៅជាយក្រុងភាគខាងត្បូងនៃរដ្ឋធានី Beirut កាលពីថ្ងៃសុក្រ(ទី១៥ខែវិច្ឆិកា)។

លោក Donald Trump ប្រធានាធិបតីជាប់ឆ្នោតអាមេរិក បាននិយាយកាលពីថ្ងៃព្រហស្បតិ៍(ទី១៤ខែវិច្ឆិកា)ថា រដ្ឋបាលរបស់លោកនឹងខិតខំប្រឹងប្រែងដើម្បីបញ្ចប់សង្គ្រាមរវាងរុស្ស៊ី និងអ៊ុយក្រែន។ ប្រភពបីសារព័ត៌មានAnadolu។

ប្រទេសអ៊ីរ៉ង់ បង្ហាញឆន្ទៈក្នុងការចរចា ដើម្បីដោះស្រាយបញ្ហាជាមួយទីភ្នាក់ងារថាមពលអាតូមិចអន្តរជាតិ (IAEA) ទាក់ទងនឹងកម្មវិធីនុយក្លេអ៊ែររបស់ខ្លួន ប៉ុន្តែបានបដិសេធមិនព្រមចុះចាញ់ នឹងសម្ពាធពីប្រទេសលោកខាងលិចឡើយ។

ក្រសួងសុខាភិបាលលីបង់ បាននិយាយកាលពីថ្ងៃព្រហស្បតិ៍(ទី១៤ខែវិច្ឆិកា)ថា ចំនួនអ្នកស្លាប់ ដោយសារការវាយលុកដែលកំពុងបន្តរបស់អ៊ីស្រាអែល លើប្រទេសលីបង់ ចាប់តាំងពីថ្ងៃទី 8 ខែតុលា ឆ្នាំ 2023 បានកើនឡើងដល់ 3,400នាក់ហើយ។

KCNA ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃសុក្រ ទី១៥ ខែវិច្ឆិកានេះ បានឱ្យដឹងថាលោក គីម ជុងអ៊ុន បានធ្វើតេស្ដដ្រូនអត្តឃាតមួយគ្រឿង ហើយបានបញ្ជាឱ្យបង្កើនការផលិតអាវុធប្រភេទនេះទ្រង់ទ្រាយធំ ដោយនិយាយថាការកើនឡើងនៃតម្រូវការដ្រូនអត្តឃាតនៅជុំវិញពិភពលោក តម្រូវជាបន្ទាន់ឱ្យមានការធ្វើបច្ចុប្បន្នភាព អាវុធ។

មន្រ្តីជាន់ខ្ពស់ផ្នែកសន្តិសុខតៃវ៉ាន់ បាននិយាយថា ដែនកោះនេះ នឹងបន្តខិតខំពង្រឹងសមត្ថភាពយោធារបស់ខ្លួន ខណៈវាហាក់ជាសញ្ញាមួយបង្ហាញចង់ទៅកាន់ លោក ដូណាល់ ត្រាំប្រធានាធិបតីជាប់ឆ្នោតអាមេរិក ឱ្យបានឃើញថា តៃវ៉ាន់កំពុងពង្រឹងវិស័យការពារជាតិរបស់ខ្លួន។